BASSMA_RAYAN's Notizen, 11 Okt 19

ايه هو الريفيد ؟ وازاي نعمل ريفيد صح ؟
الريفيد هو انك تكون متبع دايت قليل النشويات
وتبدأ تاخد يوم تاكل فيه كميه نشويات كبيرة وبدون حساب للماكروز 📴
الريفيد ليه فوايد طبعا 😁😁
🚩طبعا بيقلل من شعورك بالاشتياق للسكريات
🚩بيقلل من هرمون الجريلين المسئول عن الإحساس بالجوع
🚩بيزود من قدرة الجسم على الحرق
🚩بيعزز من حساسية الانسولين
اللي منتشر بقى بين الناس الجديده على الدايت ... ان الريفيد هو معناه لخبطة الدايت .. فبقيت الاقي ناس تسأل اسئلة زي
انا بقالي اسبوعين ريفيد ومش عارفه ارجع الدايت؟
او انا اسبوع كيتو وعملت النهارده ريفيد اعمل ايه؟
فلازم نعرف اي هي شروط الريفيد؟؟؟
اولا: الريفيد بيكون في الدايتس المعتمده على نشويات منخفضة .. فلو لخبطت الدايت في الدايت العادي اسمه تشيت داي .. او يوم فري .. لإن في فرق كبييير بين الاتنين
ثانيا: مافيش حاجه اسمها ريفيد بعد اسبوع من بداية الكيتو
ولو عملت كدا يبقى اسمها عدم التزام ولعب في كيمياء جسمك
والدايت ده مش قادر تلتزم بيه اختار دايت غيره مناسب ليك اكتر 👍
ثالثا: الريفيد بيكون بعد بداية الكيتو بأقل حاجه شهرين
لييييه ؟ على شان يكون جسمك اتعود على ان الدهون هي المصدر الأساسي للطاقة ويقدر يرجع تاني للكيتوسيز بسرعة
على شان كدا الناس اللي بتعمل ريفيد كل اسبوع او كل اسبوعين .. بيعانوا كتييير من ثبات الوزن
رابعا: الريفيد مدته ٢٤ساعة مافيش حاجه اسمها بقالي اسبوعين ريفيد ... كدا انت خرجت من الكيتوسيز وجسمك رجع اعتمد على النشويات تاني ونسي الدهون ولما ترجع هتعيد كل حاجه من الاول .. الاعراض والفلو وكله 😔😔
واخيرا ملاحظاتي ونصائحي الشخصية عن الريفيد :
اولا: بلاش تعمل ريفيد عشوائي ... يعني الحاجه عامله محشي النهارده .. هوباااااا .. انا هعمل ريفيد 😂😂
لا طبعا كدا هتقلل ارادتك .. وهتتعود على كدا وتكررها وهيكون صعب جدااااا تلتزم تاني
ثانيا: بلاش ريفيد اكتر من يوم ... لإنك كل ما تأخر رجوعك كل ما هيكون اصعب 😔
ثالثا: بلاش تاخد كمية سكريات مفاجئة مره واحده
ممكن تبدأ تزود سكريات بشكل تدريجي على شان السكر في دمك ما يعلاش فجأة وهيأثر جدااااا عليك وعلى تركيزك
رابعا: نصيحة شخصية بلاش تبدأ الريفيد وانت بره البيت
عملتها قبل كدا .. وسكر دمي ارتفع جداااا وجالي دوخه وربنا ستر ان اختي كانت معايا ولحقتني 🥺🥺
مع العلم اني مش بعاني من اي نوع من انواع مرض السكري
خامسا: عادي يحصل ثبات وزن بعد الريفيد ممكن يوصل لإسبوعين واحيانا اكتر ... على شان كدا لازم لما نعمل ريفيد يكون فعلا يوم يستاهل كل ده
سادسا: في اعراض لازم نتوقعها بعد الريفيد زي الاسهال والانتفاخ والحموضة واحيانا شعور بالقىء والشعور بالصداع والنعاس وانعدام التركيز كل ده بسبب دخول النشويات للجسم بشكل مفاجىء
واخيرا: لازم يكون بين كل ريفيد والتاني على الأقل شهرين على شان الجسم يكون قدر يرجع لمعدلاته اللي فاتت و رجع للدهون بشكل اساسي 👍👍