BASSMA_RAYAN's Notizen, 15 Apr 18

صحتيين بسووم 

بسمة انتى ماشيا كيتو دايت صح  

أكيييد .. الكلام الجاي ده منقول من صفحة سارة كيتشن على الفيس وهحط اللينك بتاعها في الاخر لو عايز تتابعها في حوار الكيتو هشرحلكم الدايت بإختصار بدون دخول في حاجات معقده و شرح الدايت اللي بيلخبط ناس كتير هو نظام غذائي فكرته كلها إنه بيعتمد على الدهون كمصدر طاقه و بيحرق منها طول اليوم و لما يخلص استهلاك الدهون اللي داخل من أكلنا ، بيبدأ يحرق من الدهون المتخزنه في الجسم علشان هي دي مصدر طاقتة الوحيده بعد ما بيخلص الدهون الجايه من الاكل ، و كمان بيعتمد على ان الانسولين في جسمنا يكون مش عالي و ده مش هيخلينا نجوع كتير 🔵 أكلنا بيكون اكبر نسبه فيه دهون ٧٥٪؜ و كميه معقوله بروتين ٢٠٪؜ و كميه قليله اوي كارب بناخدها من الخضار اللي بناكله ٥٪؜ مبدأياً كده نسبة الكاربوهيدرات في اكلنا لازم تكون ٥٪‏ أو اقل‏ علشان كده ممنوع أكل الرز و المكرونه و المخبوزات و المعجنات و العيش و أي حاجه عاليه في النشويات و معموله بدقيق سواء ابيض او دقيق اسمر ممنوع كمان البطاطس و البطاطا و الجزر و اي خضار بينمو تحت الارض علشان بيكونوا عاليين في النشويات ممنوع كل انواع البقوليات و كل الفاكهه ما عدا الفراوله بكميه معقوله و الأڤوكادو و التوت ، علشان الفاكهه فيه نسبة سكر عاليه و ده شئ مرفوض في الدايت ، مش بنستعمل اي سكر خااالص غير بس ستيڤيا و ممكن سويتال بكميه قليله - ممنوع اللبن و الزبادي - ممنوع الشوكلاته اقل من ٨٥٪‏ كاكاو علشان بيكون فيها نسبة سكر عاليه - الشيبسي و البيبسي و البسكويت ممنوع طبعاً المسموح بقى : - اللحوم بجميع انواعها - السمك و المأكولات البحريه - البيض - الجبن الرومي ، شيدر ، فيتا ، اي جبنه عاليه في الدسم و قليله في الكارب و ده بنعرفه من المعلومات الغذائيه المكتوبه على اي حاجه بنشتريها ، و بفضَل كمان بلاش الجبن اللي مكتوب عليها مطبوخه - الدهون بناخدها من الزبده او سمنه بلدي او زيت زتون و زيت جوزهند و اڤوكادو و مكسرات - مسموح كمان استعمال كريمة طبخ و كريمة خفق - اللبنه مسموحه - الخضار مسموح كل الورقيات الخضراء و الكوسا و القرنبيط و البروكلي و الطماطم و الخيار و الفلفل و المشروم و السبانخ انا عن نفسي بحسب كل حاجه بميزان و بدخلها على application يحسبلي السعرات و يحسبلي نسبة الدهون و البروتين و الكاربوهيدرات في الاكل علشان ملخبطش و متجاوزش حدود المسموح ليا حسب جسمي و وزني و نسبة الدهون اللي عندي نبدأ بعيوب الدايت ، إنه محتاج دقه و حساب لكل حاجه بتاكلوها ، إنه فعلاً مكلف و علشان تعمل وصفات جديده لازم هتحتاج مكونات جديده و دقيق لوز و دقيق جوزهند لو عايز تاكل كيك و دي حاجات في مصر مش رخيصه بس عادي اللي عايز يلتزم بميزانيه معينه اكيد هيقدر و يكتفي بحاجات معينه ** مكلف كمان علشان هتخسوا و لبسكم هيوسع و هتحتاجوا ميزانيه تشتروا لبس جديد اول ايام بيحصل حاجه اسمها كيتو فلو ، تعب و ارهاق و كسل و مش هتقدروا تمارسوا رياضه و هيكون فيه صداع و دوخه و ممكن اعراض البرد العاديه و ده اللي حصل معايا و ممكن مش كل الناس يحصل معاهم كده ، بس بعد اسبوع كل الاعراض دي بتختفي تماماً و هنا بقى هقولكم على المميزات : * طاقه و نشاط مش طبيعيين * حاله من الشبع * نزول ملحوظ في الوزن في فتره مش كبيره * تركيز ذهني عالي جداً * تاني هقول مش بنجوع و قليل اوي لما يحصل رغبه في أكل سكريات او كاربوهيدرات و مش هيكون عندك احساس انك عايز تلخبط الدايت او هتموت على وجبه فري * قبل كيتو كنت لازم أخد Amino energy preworkout علشان يمد جسمي بالطاقه ، بعد الكيتو الحمدلله بطلت اشرب اي حاجه علشان الطاقه * علشان تقدر تحافظ على المعادله دي و تحمي نفسك من كيتو فلو ، لازم تهتم بالـ Electrolytes اللي من ضمنهم صوديوم و بوتاسيوم و ماغنسيوم أنا مش هقولكم خسيت كام كيلو و الكلام ده ، أنا أصلاً مش بستعمل ميزان غير كل سنه مره و بعتمد أكتر على التغيير اللي بيحصل في شكلي و المقاسات اللي بتتغير ، كيتوچينيك دايت فرق معايا جدا جدا و هستمر عليه مش هوقف ، انت ممكن تخس ١٠ كيلو في شهر غيرك ممكن يخس ٥ كيلو فمينفعش تسأل حد خسيت أد ايه و يبقى ده مقياسك لأنها بتختلف من شخص لشخص حسب نسبة الدهون في جسمه و حسب مجهوده و أكله ♦️ بخصوص الناس اللي عندها مشاكل صحيه او نسبة كوليسترول عاليه ، مينفعش تنفذوا الدايت ده قبل ما تستشيروا الطبيب المختص بحالتكم علشان ميحصلش مشاكل صحيه اكتر صفحة سارة على الفيس بوك https://www.facebook.com/Sarahskitchen91/  

dodoezz435 ميرسي دودو 

a.ghonemy22 صحيح .. والحمد لله لقيت حل لمعظم مشاكلي .. تقدر تقول اكتر نظام مناسبني ... لو عندك أي سؤال عنه انا تحت أمرك :)